16.09.2016թ-ից 18.09.2016թ. ընկած ժամանակահատվածում ՀՀԿ Լոռու Մարզի ԵԿ անդամներն եղան Ծաղկաձորում:

Եռօրյա հանգստի ընթացքում նրանք հյուրընկալեցին ՀՀԿ մարզային խորհրդի համակարգող Հովհաննես Գաբրիելյանին, ՀՀԿ ԵԿ խորհրդի անդամ, ՀՀԿ կուսակցական-քաղաքական դպրոցի համակարգող Հայկ Մամիջանյանին: Նրանց հետ շփումը անցավ բավականին ջերմ և անմիջական մթնոլորտում: Հյուրերը երիտասարդ հանրապետականների հետ զրուցեցին ՀՀԿ ԵԿ հանձնաժողովների ձևավորման, դրանց բնույթի մասին, ինչպես նաև կուսակցական միջոցառումներին երիտասարդների ակտիվության և մասնակցության մասին: Քննարկեցին նաև կուսակցական-քաղաքական դպրոցի ընդունելության և դասընթացներին վերաբերող հարցերը:
Երիտասարդներին իր ներկայությամբ ուրախացրեց նաև Վանաձոր քաղաքի ՏԻՄ ընտրություններին Հայաստանի Հանրապետական կուսակցության ցուցակը գլխավորող Մամիկոն Ասլանյանը: Քաղաքապետի թեկնածուի հետ հանդիպումը ևս անցավ ջերմ և շատ ուրախ: Քննարկվեցին բազմաթիվ հարցեր` քաղաքի ծայրամասային խնդիրներից մինչև նոր թանգարանի բացում, աշխատատեղերի ստեղծումից մինչև այգիների վերանորոգում և նմանատիպ այլ հարցեր: Մամիկոն Ասլանյանը մեծ տեղ և նշանակություն է տալիս երիտասարդությանը և դա է պատճառը, որ նրա հետ հանդիպման ժամանակ երիտասարդներն իրենց դրսևորում են անկաշկանդ և անմիջական:
Կուսակցական և քաղաքական հանդիպումներից բացի երիտասարդության համար կազմակերպվել էր նաև ակտիվ միջոցառումներ և թե՛ ինտելեկտուալ, թե՛ ժամանցային խաղեր:
Ուսանողներին իր հաճելի անակնկալը մատուցեց նաև ՎՊՀ-ում տնտեսագիտական ամբիոնի դասախոս, Լոռու մարզպետարանի ֆինանսների վարչության պետ` Հրայր Պապոյանը իր ներկայությամբ:
Երիտասարդների հետ իր անկեղծ շփումն ունեցավ նաև ՀՀԿ Լոռու մարզի ԵԿ նախագահ, Լոռու մարզպետարանում մարզպետի օգնական՝ Արման Սարգսյանը: Դա դրսևորվեց նրանց հետ ունեցած իր զրույցներով, իր ակտիվությամբ, խաղերին իր մասնակցությամբ, ցանկացած երիտասարդների համար իր անհանգստությամբ: Հանգստյան օրերը նրանց համար անցավ բուռն և հագեցած: